මිඩ්වයිෆ් නෝනලාට මාරුවීම් දෙනවා කියා වංචා කළ හොරෙකු සොයයි
- ප්‍රවෘත්ති හා කාලීන
සංස්කාරක
- 0
- 1 minute read
සෞඛ්‍ය අමාත්‍යාංශයේ ලේකම්වරයෙකු ලෙස ව්‍යාජව පෙනී සිටිමින් ස්ථානමාරු ලබාදෙන බව පවසා පවුල් සෞඛ්‍ය සේවා නිලධාරිනියන් ගෙන් රුපියල් ලක්ෂ ගණනින් මුදල් ලබාගත් බව කියන පුද්ගලයෙකු අත්අඩංගුවට ගැනීමට පොලීසිය පරීක්ෂණ පවත්වයි. මාරුවීම් සකස්කර දීමට බව පවසා රුපියල් 25000.00 ක පමණ මුදලක් මෙම පුද්ගලයා ඊසි කෑෂ් ක්‍රමයට පවුල් සෞඛ්‍ය සේවා නිලධාරිනියන්ගෙන් ලබාගෙන තිබෙන බව පොලිස් පරීක්ෂණ මගින් අනාවරණය වී තිබේ. සෞඛ්‍ය අමාත්‍යාශයේ ලේකම්,අතිරේක ලේකම් මෙන්ම පළාත් සෞඛ්‍ය ලේකම්වරයෙකු ලෙස වරින්වර මෙම පෙනී සිටිමින් මෙම පුද්ගලයා අදාළ මුදල් වංචා සිදුකර තිබෙන බව රජයේ පවුල් සෞඛ්‍ය සේවා සංගමයේ සභාපති දේවිකා කොඩිතුවක්කු මහත්මිය පැවසුවාය. සෞඛ්‍ය අධ්‍යක්ෂ කාර්යාල වෙත දුරකතන ඇමතුම් ලබාදී ස්ථාන මාරු ඉල්ලුම්කොට ඇති පවුල් සෞඛ්‍ය සේවා නිලධාරිනියන්ගේ සියලු තොරතුරු ලබා ගැනීමෙන් පසු මෙම පුද්ගලයා එම නිලධාරිනියන්ගේ දුරකථන අංක වලට කතාකොට සෞඛ්‍ය අමාත්‍යාංශයේ ලේකම්වරයෙකු බව හඟවා මාරුව සකස්කර දෙන බව පවසමින් ඔවුන්ගෙන් මුදල් ලබාගෙන තිබෙන බව කොඩිතුවක්කු මහත්මිය පවසයි. අදාළ ස්ථානමාරුව සිදුකිරීම ඉතාමත් අසීරු කරුණක් බවත් යම් මුදලක් වැය කිරීමට හැකි නම් එය කරගත හැකි බවත් කියමින් මෙම පුද්ගලයා පවුල් සෞඛ්‍ය නිලධාරිනියන් රවටා මුදල් ලබාගෙන තිබේ. දිවයිනේ ප්‍රදේශ රැසක පවුල් සෞඛ්‍ය නිලධාරිනියන් මෙම පුද්ගලයාගේ වංචාවට අසුව තිබෙන බවත් පොලිස් ස්ථාන ගණනාවකට සිදුකළ පැමිණිලි ඔස්සේ මේවන විට පරීක්ෂණ සිදුකෙරෙන බවත් කොඩිතුවක්කු මහත්මිය කීවාය.
